踏血寻梅

评分：

6.0 还行

原名：踏血尋梅又名：Port of Call

分类：剧情 / 悬疑 / 犯罪 / 地区：中国香港年份：2015

简介： 2009年，十六岁的湖南女孩王佳梅（春夏饰）追随改嫁的妈妈和姐姐的脚步来到了香

查看详情

更新时间:2016-05-15

踏血寻梅影评：尋。

　　呢出戲之前都略有所聞，似乎都幾有好评，後嚟無意中睇到原嚟片中嘅女主角同豆瓣都有過一段渊源，所以就揾嚟睇下啦。冇谂到係粤語版嘅，後嚟先知係因為内地冇上映嘅原因，都算係有驚喜啦，始終都係聽原音好啲，尤其係粵語就更加親切啦。

　　之前都有睇過下介紹，知道電影改編自真實事件，開始仲以為故事會重點放行偵查上先，但冇諗到兇手一開頭就自首啦，開始都以為背後肯定仲有乜黑幕先嘅，但係真相就係咁。不过雖然知道左兇手，但動機都很重要嘅，所以先會放到最後講。而且真相并唔代表一切，真相嘅背後總係有一連串嘅故事，佢哋各自醞釀，互相影響，最后重叠成真相。呢出戲主要講嘅都係呢部分，關於生活、理想、慾望……雖然呢啲詞用到爛晒，但故事總會不斷重複，其中講啲乜就個人有個人的睇法啦。不過呢出戲都拍得幾有文藝Feel，再加埋一啲小幽默，並唔會令人感覺成出戲太黑暗，甚至唔似係一個真實的故事。

　　講返女主角，話晒都同佢有十萬八千裡嘅關係嘅，不過之前真係未聽聞過，睇個樣都幾青春靚麗嘅，啱晒演呢啲學丨生丨妹。演技就唔加評論啦，唔識呢啲嘢，不過睇介紹好似已經攞左獎啦。所以都有令我谂到汤唯嘅，同样都有全裸嘅床戲，雖然少左啲，但都冇咁大爭議。同样都係一炮而红，但好似冇咁大嘅熱度，可能係自己冇關注啦，不過無論點都係祝佢嘅星途可以一帆風順啦。

　　然後講下白只，同樣都係唔識嘅，不過繼林雪、林子聰之後，又多左個令人印象深刻嘅肥仔，當然洪金寶、鄭則仕呢啲我都記得嘅。但係睇翻白只佢本人介紹嘅相又好似唔算好肥，帶上眼鏡顯得好斯文，完全唔會令人諗到嗰個分屍嘅肥仔。其實分屍嗰喥都几令人毛骨悚然，講到好似劏猪咁，然後不禁遐想如果将人放行砧板喥會係點呢？原嚟殺人都可以係一件好簡單嘅事，就好似劏雞殺魚咁。

　　郭富城就唔知講乜啦，冇乜關注，演技之前就得到肯定咖啦，差佬又都演過唔少次啦，今次嘅形象都可以話令人深刻嘅。不過因為故事分成三條線，所以戲份並唔算多。聽講導演版嘅戲份會足啲，以後有機會先再去睇下啦。

　　另外覺得比較得意嘅係kdjfjdfj呢串符號，因為有時玩電腦太無聊唔知做啲乜嗰時都會亂撳dfjk呢四個鍵，但係話唔會將佢寫落嚟，所以第一次睇到嗰時都覺得有啲疑惑。雖然最後的答案係“看得見風景的房間”，但其實呢個係埋佢撳咁好多次嘅結果呢，從而反映佢內心的孤獨？

　　題外話，原嚟學丨生丨妹呢個詞行呢喥係敏感詞彙嚟嘅，唔知行幾時起，學丨生丨妹已經變成左一個帶有色情成分嘅詞彙。